Pubblicato il bando per la Festa della Patria del Friuli 2023
di CS ARLeF
Publicât il bant pe Fieste de Patrie dal Friûl. I Comuns des trê ex provinciis furlanis dal Friûl-Vignesie Julie e i 7 Comuns furlans dal Venit a varan a disposizion fonts par 47.500 euros. Domandis dentri dai 15 di Fevrâr In prevision de edizion numar 46 de “Fieste de Patrie dal Friûl”, che chest an e je in program a Caprive, tal Friûl orientâl, la ARLeF e à publicât un bant par sostignî lis manifestazions culturâls inmaneadis dai ents locâi che a insiorin il calendari de manifestazion che e celebre la date di fondazion dal Stât patriarcjâl furlan, il 3 di Avrîl dal 1077. Pal 2023 la Agjenzie, in acuardi cu la Regjon autonome Friûl-Vignesie Julie, e à metût a disposizion 47.500,00 euros. A podaran acedi ai fonts i Comuns che a àn la lôr sede legâl tai teritoris des ex provinciis di Gurize, Pordenon e Udin e, in graciis di un acuardi sotscrit tra lis Regjons Friûl-Vignesie Julie e Venit, i Comuns furlans dal Venit (Cint, Concuardie, Fossalte, Gruâr, Puart, San Michêl dal Tiliment, Tei). Il bant al fisse che si finanziaran lis ativitâts indreçadis a valorizâ lis origjins, la culture e la storie di autonomie dal popul furlan. In particolâr: events di cualitât che a cjapin dentri soredut lis gjenerazions plui zovinis e pensâts par fâ cognossi e/o aprofondî la lenghe, la storie e la culture dal Friûl; come ancje la stampe e la difusion di publicazions che a vedin chê stesse finalitât; infin la realizazion e instalazion di lastris, targhis o segnâi turistics par memoreâ personalitâts che a vedin contribuît in maniere significative ae conservazion e al disvilup de identitât furlane. Lis ativitâts culturâls a podaran jessi inmaneadisdi un ent locâl singul o pûr di agregazions. Lis domandis a varan di rivâ dentri dai 15 di Fevrâr dal 2023,dome vie pec ae direzion: arlef@certgov.fvg.it. Par dutis lis informazions sul bant, si pues telefonâ al 0432 555910,o scrivi a: federica.delpino@regione.fvg.it. Par lei il bant complet cliche achì.
