30/03/2025
Furlan
PERAULE DI VITE: Dut ce ch’e veve par vivi
di A cura di Letizia Magri, traduzion di Franca Mainardis
“Jê, cheste vedue, inte sô miserie e à metût intal tesaur dut ce ch’e veve, dut ce ch’e veve par vivi. “ ( Mc 12, 44)
O sin a la fin dal cjapitul 12 dal Vangeli di Marc. Gjesù al è intal templi di Gjerusalem; al cjale e al insegne. Mediant il so cjalâ o viodìn une sene plene di personaçs: personis ch’a van e a vegnin, religjôs, nobii cun viestis lungjis, siôrs ch’a butin lis lôr sioris ufiertis intal tesaur dal templi. Ma ve’ si fâs indevant une vedue; e fâs part di une categorie di personis miserevulis dal pont di viste sociâl e economic. Intal disintares gjenerâl, e bute intal tesaur pôs minûts. Gjesù invecit si necuarç, al clame i siei dissepui e ju istruìs:
“Jê, cheste vedue, inte sô miserie e à metût intal tesaur dut ce ch’e veve, dut ce ch’e veve par vivi.”
“In veretât us dîs…”. A son lis peraulis che Gjesù al dopre par i insegnaments impuartants; la cjaladure di Gjesù, concentrade su la puare vedue, nus invide a cjalâ inte stesse direzion: e je jê il model dal dissepul. La sô fede intal amôr di Dio e je cence condizionaments; il so tesaur al è Dio stes. E tal consegnâsi dal dut a lui, jê e brame ancje dâ dut ce ch’e pues par cui ch’al è plui puar. Chest bandonâsi cun fede al Pari e je, in cualchi mût, l’anticipazion dal stes dâsi di sé che Gjesù al compirà prest cun la sô passion e muart. E je chê “puaretât di spirt” e “purece di cûr” che Gjesù al à proclamât e vivût. Chest al vûl dî “ meti la nestre fiducie no intes ricjecis, ma intal amôr di Dio e inte sô providence (…) Si è “puars in spirt” cuant che si lassisi vuidâ dal amôr vers chei altris. Alore o spartìn e o metìn a disposizion di chei ch’a son bisognôs ce ch’o vin: un rideç, il nestri timp, i nestris bens, il nestri savê fâ. Vint dut dât, par amôr, si è vueits, un nuie, libars, cul cûr pûr”. La propueste di Gjesù e disladrose la nestre mentalitât; al centri dai siei pensîrs al è il piçul, il puar, l’ultin.
“Jê, cheste vedue, inte sô miserie e à metût intal tesaur dut ce ch’e veve, dut ce ch’e veve par vivi”
Cheste Peraule di vite nus invide prime di dut a rignuvî la nestre plene fiducie intal amôr di Dio e a confrontâsi cul so mût di cjalâ lis robis, par viodi al di là des aparincis, cence judicâ e dipendi dal judizi di chei altris, a dâ valôr positîf a ogni persone.
Nus indete la totalitât dal don come logiche evangeliche ch’e fâs sù une comunitâ pacificade, parcè che nus sbrunte a vê cure un dal altri. Nus rinfrancje tal vivi il Vangeli ogni dì, cence dâ tal voli; a vivi cun moderazion, inte condivision. Nus clame a meti la nestre atenzion sui ultins, par imparâ di lôr.(…)
