20/06/2025
Furlan
Ce timps …!
di Gotart Mitri
La comunicazion e je une robe che in dî di vuê no podìn no tignî di cont. A covente par tignîsi informâts su ce ch’al sucêt ator. Ancje masse! Si cor il riscjo di une soresposizion che si puarte daûr il pericul di incrosâ ancje notiziis tantis voltis falsis. Sino pronts a controlâ cualis ch’a son veris e cualis no? Si à di stâ cetant atents.
Ma ce che nus ven butât devant dai voi al è alc che nô, citadins di chest mont, no rivìn a capî. Chei trê-cuatri “parons” ogni altre dî no fasin altri che pitufâsi cun menacis di dazis, di gueris e ce diaul altri! Nus somee di sei intune betoniere, sbalotâts di ca e di là. Gueris in direte par television, vûstu in Ucraine, a Gaza e cumò nus capite, e i sentivi la mancjance, chê tra Isarêl e Iran! E i sorestants che a corin ator a fevelâ di ducj i berdeis e magari, nome cun cjacaris. Ma un citadin dal mont ce jentrial in chês ch’a somein dome dispiets a nivel personâl jenfri chei cuatri “parons”? E a chescj cuatri “parons” ur interessie di sintî il parê, di sintî la volontât dai citadins dal mont? La reatât e je cetant amare: i problemis reâi dal ambient, dai coscj da la vite ch’a van dome sù come i fasoi ta la pignate, dai problemis da l’aghe, da la fan, dai ospedâi, dal lavôr, da lis injustiziis? Chescj problemis di vite reâl no jodin di risolviju, tacant propit di cjase nestre. Il cont purtrop i rivarà sù par la cope da lis gnovis gjenerazion che nô, in plene colpe, pal avignî no rivin a fâur jodi positîf. Ma si rivie ancjemò a fevelâ di sperance? Si dîs, o scugnìn vê sperance, ma cun ce ch’al sta sucedint ogni dì al è propit dificil! Ma si podie fevelâur di sperance par l’avignî a la nestre zoventût? La soluzion a sarès che chei cuatri “parons” si gjavassin d’intor dut il lôr egoisim personâl che dal sigûr al sbat cuintri il concet di une umanitât solidâl, inclusive, gjenerose ch’e à tant che bussule la fraternitât, l’ugualiance e la libertât. Ma no sono plui di dusinte agne ch’a nt si fevele; ce fin àno fat?
