16/04/2025
Regione, Furlan
La Setemane de Culture Furlane, un event straordenari
di Gotart Mitri
Come di tancj agns a cheste bande, tal mês di Mai, la Societât Filologjiche Furlane a propon chest event di particolâr significât parvie ch’al cjape dentri doi aspiets da la culture furlane: di une bande l’aspiet spaziâl, a dî che i events proponûts si fasin ator pal Friûl, scuasit dapardut, tratant che si fevele, pôc su pôc jù, di un centenâr di paîs; di chê altre bande, si tocjin, a dut cjamp, i plusôrs aspiets da la culture: leteradure, art, storie, cjant, paisaçs, architeture, scuele … . Baste visitâ il sît internet di pueste (www.setemane.it) e jodi ducj i apontaments cu lis specifichis da la zornade, da l’ore, dal puest, dal contignût e dai reladôrs. Al è un event che la Filologjiche si svante, justamentri, di vê inmaneât e di sei braurose parvie che l’interès al môf un pôc dut il mont culturâl e no dome: pensìn a lis Scuelis, ai Comuns, ai Museus, a lis Pro Loco, a lis diviersis Associazions. La manifestazion a gjolt dal patrocini dal Ministeri da la Culture, da la Regjon Friûl Vignesie Julie, da la Fondazion Friuli e dal Ente Friuli nel Mondo. Si trate di une vetrine da la Culture Furlane ben furnide e cetant siore di propuestis e si invide ducj a profitâ di cheste ocasion straordenarie par cognossi miôr la nestre culture, la nestre storie, il nestri teritori, insumis la nestre identitât.
