15/05/2025
Regione, Furlan
Parons dal Friûl: i Savorgnans
di Gotart Mitri
Fevelâ dai Savorgnans al ûl dî fevelâ di une famee ch’e à paronât il Friûl par plui di cualchi secul. In plui, cheste famee si jere sparniçade ator parvie dai tancj ramaçs ch’a jerin dâts dongje. Disìn dal moment ancje che il steme di famee, la sclese nere, il V ribaltât, in cjamp blanc al è chel dal Comun di Udin e chel ch’al compâr in biele mostre su la mae da l’Udinês.
Tal imprin la famee e jere stade favoride dai privilegjos e da lis inviestiduris di bande dal patriarcje Bertrant di Saint Geniés, che la famee dopo da la muart di chel sant patriarcje e veve doprât par paronâ su Udin. Par chest i Savorgnans si vevin metût cuintri i patriarcjis di dopo e di certe nobiltât udinês e a vevin cirût poe, e le vevin cjatade, a Vignesie che tal 1385 si ju veve iscrits ta la lôr aristocrazie. Al sarà chel seguitîf un periodi, passe 50 agns, plen di pagjinis scuris e sanganosis. Calcolâts traditôrs par jessisi vendûts ai Venezians, a vevin cuintri scuasit dute la nobiltât locâl e a jerin nassûts doi grups in lote: chel dai Zambarlans, i Savorgnans e i cualchi nobil di Udin, e i Strumîrs, filoimperiâi. Al è chest il moment cuant ch’al compâr il plui impuartant rapresentant da la famee, Gerolamo Savorgnan.
Al veve vût une formazion culturâl bastant par un che si inviave a la cariere militâr, che si esercitave cui fradis plui grancj, Antonio e Giacomo, e cul cusìn Niccolò. Gerolamo si jere metût in mostre judant Vignesie cuintri lis invasions imperiâls di Federico III e ta la difese di Gardiscje dal Lusinç. Po, ancje ta la vuere cuintri Massimiliano, cul compit di tignî di voli chei nobii furlans di Udin e di Cividât ch’a simpatizavin pai imperiâi. Cu la pâs di Cambrai Vignesie e veve finît la sô espansion su la tiereferme. In Patrie Gerolamo si jere dât di fâ cuintri i paîs “imperiâi”, Pontebe, Cormons, Cjistielgnûf), brusantju. Po si jere ritirât ta la sô fuartece di Osôf, intant che a Udin intal carnevâl dal 1511 si jere consumade la “crudel zobia grassa”, cu lis masnadis dai Zambarlans comandadis dal cusin Antonio che a vevin fat un stragjo dai nobii Strumîrs e brusâts une vincjine di cjistiei ator. Dopo i imperiâi a jerin tornâts a cjapâ il podê par un trat curt di timp, ma a jerin stâts parâts vie mediant dal aiût di Gerolamo Bartolomeo d’Alvian. E jere restade fûr dome la fuartece di Maran e un ultin tentatîf di riconcuistâle nol veve vût sucès e par Gerolamo Savorgnan chest al jere stât l’ultin at di vuere. Lui si jere ritirât a Osôf. I Savorgnan a vevin pierdût il dirit di niederlech, une tasse di paiâ par discjamâ lis marcanziis e sostâ a Glemone, ma Vignesie ur veve lassât une pension di 400 ducâts par an.
I Savorgnans a vevin mantignût i lôr possès: la fuartece di Osôf, Palaçûl, Cjistielgnûf e la contee di Belgrât cun Bicinins, Flambri, Lestize, Sclaunic, Mussons, Gnespolêt, San Pieri, San Pauli, Talmassons, Vilecjasse e, plui tart ancje Bertiûl, Torse, Lavorêt e San Vidot. Nus plâs ricuardâ, a nivel locâl, che ancje Rivis al partignive a la contee di Belgrât propit. A la glesie dal paîs “dal bas”, prin dedicade a S.Margarite, titul trasferît a la “gnove glesie” dal paîs “sul alt”, chei di Rivis i vevin dât il titul di San Gerolamo come forme di ringraziament par Gerolamo Savorgnan ch’al veve regalât i terens par fâ sù Rivis “gnûf”, dulà ch’al è vuê.
Ancjemò un pâr di notis biografichis su Gerolamo: al jere nassût tal 1465, 560 agns indaûr. Si jere maridât plui voltis e al veve vût, pôc su pôc jù, plui di vincjetrê fîs. Tancj i jerin muarts di piçui e lis cuatri feminis a jerin stadis sieradis intun convent.
Insom, al jere maurt a Vignesie ai 30 di Març dal 1529. I siei vuès a la fin a risposin ta la glesie parochiâl sul fuart di Osôf.
