23/09/2025
Furlan
Peraule di vite: Indalegraisi
di Franca Mainardis
“Indalegraisi cun me, parcè ch’o ài cjatât la mê piore, chê che si jere pierdude”
(Lc 15,6)
I pastôrs dal Orient Antîc a usavin contâ lis pioris cuant ch’a tornavin dal pascul, pronts a metisi in cercje se an fos mancjade une. A frontavin ancje il desert, di gnot, pûr di cjatâ lis pioris che si jerin pierdudis. Cheste parabule e je une storie di pierdite di cjatade ch’e met in evidence l’amôr dal pastôr. Lui si necuarç ch’e mancje une piore, la cirìs, la cjate e si la met su lis spalis, parcè ch’e je debule e spaventade, magari ancje feride e no je plui buine di lâ daûr dal pastôr di bessole. Al è lui che la puarte al sigûr e infin, plen di gjonde, al invide i siei cunfinants par fâ fieste insieme.
“Indalegraisi cun me, parcè ch’o ài cjatât la mê piore, chê che si jere pierdude”
L’argoment di cheste conte si pues riassumi in tre azions: pierdisi, cjatâ, fâ fieste. La biele gnove e je chê dal Signôr che al va in cercje di cui che si piert. Spes si pierdìn in tancj deserts che nus tocjin, o che o sin obleâts a vivi , o che nus dan ripâr: i deserts dal bandon, de emarginazion, de puaretât, des incomprensions, des disunitâts. Il pastôr nus cirìs ancje lì e, ancje se nô lu pierdìn di viste, lui nus cjatarà simpri. Cjatâ. Provìn a inmagjinâ la sene dal travajôs cirî di bande dal pastôr intal desert. E je une inmagjine ch’e tocje il cûr pe sô fuarce. O podìn comprendi la gjonde provade sevie de bande dal pastôr, sevie de bande de piore e chest incuintri al fâs tornâ inte piorute il sens di sigurece par jessi scjampade di un pericul, Il “cjatâ” al è duncje propit un at di misericordie divine. Fâ fieste: Lui al clame i sieis amîs par fâ fieste, parcè ch’al vûl spartî cun lôr la sô gjonde, cussì come che al sucêt in altris dôs parabulis ch’a vegnin dopo cheste, chê de monede pierdude e chê dal pari misericordiôs. Gjesù al vû fânus capî l’impuartance di partecipâ a la gjonde cun ducj e nus salve de tentazion di judicâ chei altris.
“Indalegraisi cun me, parcè ch’o ài cjatât la mê piore, chê che si jere pierdude”
Cheste Peraule di Vite e je un invît a vê agrât pe misericordie che Dio al à par ducj nô. Il fat di indalegrâsi, fâ fieste insieme nus presente une inmagjine di unitâ là che no esist contraposizion tra “juscj” e “ pecjadôrs”, ma o partecipìn un a la gjonde di chel altri.
E scrîf Chiara Lubich: “ Al è un invît a capî il cûr di Dio, a crodi tal so amôr. (…) La logjiche di Dio no je la nestre. Dio nus spiete simpri: anzit, j dìn une grande gjonde dutis lis voltis (…) ch’o tornìn di Lui”.
Patrizia Mazzola
(Traduzion di Franca Mainardis)
