23/03/2025
Furlan, Sport
Sontuosa giocata del nostro numero dieci
di Gotart Mitri
Inconfondibil lessic di telecronache sportive, une marche di fabriche dal nestri Bruno Pizzul, che nus à lassât. Dut a bot e sclop! Une setemane di ricovar in ospedâl e al è mancjât.
Nol à bisugne di presentazion: di cuarant’agns vôs da la RAI pai events sportîfs e in particolâr par lis partidis da la Nazionâl di balon. Il trat dal dut personâl di contâ lis partidis al jere la sô vôs, la misure e la coretece dal lessic, la cognossince dal zûc parvie ch’al jere ancje stât zuiadôr professionist in serie B, dopo ch’al veve tacât a zuiâ ta la sô scuadre di paîs, la Cormonese e podopo ta la Pro Gurize. Gjornalist adimplen, al jere tra l’altri laureât in leç, no si suponeve di dâ judizis sul arbritro, su lis tatichis dal alenadôr, justis o sbaliadis ch’a fossin stadis. Il gjornalist al à di contâ, lis azions, ce ch’al jôt. Provait a sintî chei vuê che, dal alt da la lôr suponence, si permetin di fâ i arbitros, di criticâ la formazion da lis scuadris!
Bruno, lu clami cussì parvie ch’o jeri so amì; si jerin incuintrâts cetantis voltis e al jere stât “santul!” par doi miei libris: “Il dizionari dai sports olimpics” e”L’art dal cercjadôr di vin”.
I vin ancjemò devant dai voi chê figure altone, dispès cul spagnolet in man, soridint, cuntune muse di omp bon. Ma soredut furlan. Cuant che si cjatave ator e al incuintrave i nestris Bearzor, Zoff, Burgnich, Janich, Reja, Capello, poben nol podeve fâ di mancul di fevelâur par furlan. I sarès someât cuintri nature doprâ cun lôr il talian. A chest proposit, dome un anedot che lui stes, ridint, mi veve contât. Si cjatave a Moscje, in Russie, par lis Olimpiadis dal 1980, chês boicotadis dai Merecans. Di là, dopo ch’al jere rivât, al veve volût clamâ a cjase sô mari a Cormons. Al clame il centralin, tornìn a dî o sin tal 1980 e o jerin a Moscje, par fâsi passâ la comunicazion cun sô mari: “Pront, mame, o soi Bruno, o soi rivât, ti clami di Moscje …”. Clic e la linie a cole! Al torne a clamâ la centraliniste, i passe sô mari, stes salût, ma la linie e torne a colâ!. Orpo, al fâs Bruno, e al domande spiegazions a la signorine dal centralin, che i fâs:”Provi a parlare in italiano.”. Bruno al torne a cjapâ sù il telefon: “Mamma, sono Bruno, ti chiamo da Mosca, come stai?” “Dipo, Bruno, âstu bevût, stematine!!!” La lenghe e je identitât, pôc ce fâ!
Bruno al è lât tune zornade di fin invier, tal silenzi, cence disturbâ, come ch’al jere tal so caratar, cone ch’al veve simpri vivût. Ma il cidinôr, cheste volte, lu àn rot i talians, sportîfs o mancul, ch’a àn inondât la famee di partecipazion al corot, di condoliancis. Une robe mai jodude! Cuissà ce ch’al varès dit? Poben, cumò Gotart, fasìnsi une ribuele!
Al è stât un alpin, al restarà un esempli di onestât, di semplicitât, di professionalitât e di bontât.
Tornarin a cjatâti sul to tombâl a Cormons. Mandi, Bruno e, graziis di dut.
