04/09/2025
Furlan
Tiliment, incuintri di comunitâts
di Gotart Mitri
Lis dôs rivis dal Tiliment a son simpri stadis ocasion di scambis, di relazions e ancje di barufis pai confins dai passons comugnâi. Vie pai secui lis comunitâts a jerin ancje stadis sot di une stesse diocesi e fintremai al 1818 lis comunitât di Rivis, di Turide, di Redicic e la part a soreli a mont di Grions a jerin sot la diocesi di Concuardie.
Aghe che no à impedît lis frecuentazions di zovins, di migrazion di fameis. Cussì l’antropologjie nus jude e nus dîs ch’i vin stes toponims (Poç, Grediscje, San Lurinç, San Martin …) e ancje cognons come Borgo, Pagnucco, Mitri, Truant … . Purpûr chest messedament nol à interessât la lenghe parvie che ogni comunitât e à mantignût la sô variant: jessude finâl feminîl in a, di là da l’aghe (cjasa, fuea, puarta …), verp andare di là cun zî, di ca i vin lâ.
Poben chestis comunitâts a àn pensât di incuintrâsi, di fâ une cjaminade come pelegrins, scjavaçant il Tiliment par cjatâsi o ricjatâsi, par tirâ jù rapârs intune condivision ch’a va indaûr tal timp. E alore, ai 9 di Avost une sessantine di parochians di S. Lurinç, Darzin e San Martin dal Tiliment si son metûts di buinore tal fresc in viaç par la grave sute e i parochians di Rivis e di Turide ju àn spietâts sul rapâr di ca. Si à vût môt di cjoli alc insieme intant dai salûts dai rapresentants dai Comuns di San Martin e di Sedean e dai rispetîfs plevans.
Podopo la “carovane” si è spostade ta la glesie di San Jaroni di Rivis, dulà che in curt e je stade spiegade la storie e il significât e il sens da lis pituris dentri e da lis tradizions che a jerin comunis a lis nestris comunitâts. Si à vût moments di riflession cun leturis di San Francesc e la scolte di cjants dedicâts a la Madone.
No si à podût fâ di mancul di rivâ fin a Turide, dulà che ancje chi e je stade spiegade la storie da la glesie parochiâl e da lis sôs pituris.
Prin che il cjalt al diventàs insopuartabil e dopo un altri moment di convivialitât, lis comunitâts dai pelegrins, che a àn cetant preseât cheste esperienze di fraternitât, di storie e di culture, a àn cjapât il troi par tornâ indaûr.
